Доналд Трамп Џуниор дополнително го засили предизборното ветување на неговиот татко дека ќе го намали американското финансирање за воените напори на Украина против Русија.
Најстариот син на новоизбраниот претседател на САД сподели на Инстаграм видео кое претходно го објави републиканскиот потпретседателски кандидат Сара Пејлин, со коментар:
„ПОВ [гледна точка]: Имате уште 38 дена да го изгубите џепарлакот“.
За време на кампањата, Трамп и новоизбраниот потпретседател Џеј-Ди Венс ја критикуваа администрацијата на Џо Бајден за доделување милијарди долари воена помош за Украина. Во јуни, Трамп го нарече Зеленски „најдобриот договорувач меѓу политичарите“ како одговор на напорите на Киев да обезбеди дополнителни американски средства.
Трамп постојано изјави дека за само еден ден ќе стави крај на војната што ја започна рускиот претседател Владимир Путин со инвазијата на Украина во февруари 2022 година.
Со цел да се предвидат можни кратења на финансирањето на Украина, администрацијата на претседателот Бајден во заминување планира да ги испрати последните 6 милијарди долари безбедносна помош во Киев пред инаугурацијата на Трамп на 20 јануари.
И покрај претходните изјави на Трамп, Украина зазеде помирувачки тон по неговата реизборна победа, обидувајќи се да обезбеди поддршка од неговата претстојна администрација и покажувајќи што може да понуди Киев за возврат.
-За нас во Украина и за цела Европа е исклучително важно што постојано ги слушавме зборовите на тогашниот 45-ти претседател на САД за „мир преку сила“- рече Зеленски во своето обраќање оваа недела.
„Ако ова стане принцип на политика на 47-от претседател на САД, Америка, од тоа несомнено ќе има корист и целиот свет“, додаде украинскиот претседател, пренесува Политико.
