Невообичаен потег на Северна Кореја: ќе ги прекинат врските со соседната земја
Тензиите на Корејскиот полуостров ескалираа подолго време, а сега Северна Кореја ги прекинува сите патни и железнички врски со Јужна Кореја.
Северна Кореја од средата ги прекина патните и железничките врски со Јужна Кореја, бидејќи сака „целосно да ги раздвои“ двете земји, пишува Би-би-си.
Според севернокорејската војска, тие трајно ќе ја затворат и блокираат јужната граница и ќе ја зајакнат областа на нивна страна. Во Пјонгјанг овој потег беше опишан како „мерка за самоодбрана за спречување војна“ и дека е одговор на честите воени вежби на Јужна Кореја и присуството на американските сили во регионот.
„Поради влошената воена ситуација на Корејскиот полуостров, вооружените сили на Демократска Народна Република Кореја мора да дејствуваат поодлучно“, ја резимира пораката од севернокорејската војска од државниот медиум КЦНА.
Според Би-Би-Си, патиштата и железничките пруги кои ја поврзуваат Северна Кореја со Југот ретко се користат и во последниве години постепено се исфрлени од водачот Ким Џонг Ун.
Односите меѓу Северна и Јужна Кореја се на една од најниските точки во последните години, откако Јонг Ун ја прогласи Јужна Кореја за главен непријател на почетокот од оваа година и се откажа од соработката со агенциите кои се залагаа за нивно повторно обединување додека ја зајакна безбедноста на границите. Ова предизвика загриженост во меѓународната заедница дека повторно ќе избие војна на Корејскиот полуостров.
„Мислам дека е неопходно да се ревидира дел од содржината на уставот“, рече Јонг Ун на јануарската седница на Врховното народно собрание на Северна Кореја. Според него, изразите како „северна половина, независност, мирно обединување и големо национално единство“ треба да се избришат од уставот. Тогаш тој предложи уставот да се ревидира на „наредната седница“.
Според Би-Би-Си, ова се случило оваа недела, но се уште не се објавени какви било промени во Уставот. Аналитичарот Хонг Мин од Корејскиот институт за национално обединување во Сеул смета дека Пјонгјанг ќе го чека исходот од изборите во САД пред да донесе конкретни одлуки.
