Официјален Кремљ потврди дека руските сили ќе ги таргетираат француските инструктори во Украина (за кои Париз и Киев разговараат да ги испратат), како и сите други непријателски војници или инструктори.
„Ниту еден инструктор вклучен во обуката на украинските војници не е имун од напади“, изјави за новинарите портпаролот на Кремљ, Дмитриј Песков, додавајќи дека „не е важно дали се Французи или не“.
Минатата недела началникот на Генералштабот на украинската армија, Олександр Сирски, изјави дека Франција „наскоро“ ќе испрати инструктори за обука на војниците на таа земја, која се соочува со руска офанзива од февруари 2022 година.
Набргу потоа, украинското Министерство за одбрана прецизираше дека испраќањето на инструктори „се уште се разговара“ со Франција и други земји.
Официјално, Франција нема војници кои им помагаат или ги обучуваат украинските сили во Украина.
Францускиот претседател Емануел Макрон постојано зборуваше за можноста за испраќање западни трупи да му помогнат на Киев, што предизвика отпор кај сојузниците, како и гнев од Русија.
Меѓу Европејците се разговара за план за европска коалиција на воени инструктори за обука на украински војници во Украина, што го сака Франција, но се чини дека е далеку од реализација. Многу земји се прашуваат какви би можеле да бидат последиците од ваквата одлука во однос на Москва.
