Претседателот на ВМРО-ДПМНЕ Христијан Мицкоски пред утрешната конститутивна седница на новиот состав на Парламентот, денеска се сретна со пратениците од коалицијата „Твоја Македонија“.
„Средба со пратениците на ВМРО-ДПМНЕ и коалицијата Твоја Македонија, пред конституирањето на македонското Собрание. Многу работа и резултати кои мора да ги донесеме за Македонија“, напиша Мицкоски на својот Фејсбук профил.
По парламентарните избори на 8 мај, утре ќе се одржи конститутивната седница на Собранието во нов состав.
Собранието ќе брои 120 пратеници, но на утрешната седница ќе присуствуваат само 118 пратеници чии мандати се веќе потврдени од Државната изборна комисија и им се издадени уверенија. За два мандати за кои се прегласуваше минатата среда сѐ уште течат жалбените постапки.
За претседател на Собранието ќе биде предложен Африм Гаши од коалицијата Вреди. Поради кандидатурата за претседател на Собранието, Гаши поднесе оставка од функцијата претседател на Алтернатива.
Во новиот парламентарен состав најмногу пратеници има коалицијата „Твоја Македонија“ предводена од ВМРО-ДПМНЕ – 58, коалицијата За европска иднина предводена од СДСМ има 18 пратеници, коалицијата Европски фронт предводена од ДУИ има исто 18 пратеници, коалицијата Вреди 14, а Левица и ЗНАМ имаат по 6 пратеници.
