Министерот за внатрешна и надворешна трговија Томислав Момировиќ денеска изјави дека Србија ќе може да извезува говедско месо во Кина.
„Во следните пет години извозот на говедско месо ќе биде целосно либерализиран за извоз во Кина“, изјави Момировиќ за ТВ Блиц, говорејќи за Договорот за слободна трговија меѓу Србија и Кина.
Договорот беше потпишан од двете земји на 17 октомври 2023 година во Пекинг и вклучува 10.412 производи од Србија и 8.930 од Кина. Царината на извезените производи од Србија постепено ќе се намалува, па така, на пример, за виното во следните пет години ќе биде пониска за 20 отсто годишно, додека за ракијата во следните 10 години ќе се намалува за 10 отсто.
Момировиќ изјави дека е важно продуцентите да се групираат.
„Ова е мала револуција која ќе трае од пет до десет години. Се надевам и дека за десет години ќе имаме економска размена од 15 милијарди евра со Кина“, изјави Момировиќ.
Како што рече, Србија ќе биде единствената што ќе има „ексклузивно право да ја извезува својата стока во Кина без да плаќа царина, што ќе ја претстави како главен конкурент на сите земји во Европа“.
„Замислете кога за пет години српското вино ќе се извезува на кинескиот пазар без царина, а сите други вина – унгарско, хрватско, италијанско, француско – треба да плаќаат царина од 38 до 62 проценти“, рече Момировиќ. .
Тој изјави дека виното е само еден пример и дека во оваа трговска размена се вклучени сите индустриски, машински и фармацевтски производи.
