Во заедничката изјава на Аргентина, Австрија, Бразил, Бугарија, Канада, Данска, Франција, Германија, Унгарија, Полска, Португалија, Романија, Србија, Шпанија, Тајланд, Обединетото Кралство и САД се бара ослободување на заложниците во Газа, соопштија од Службата за соработка со медиумите на претседателот на Србија.
„Повикуваме на итно ослободување на сите заложници кои Хамас ги држи во Газа повеќе од 200 дена. Меѓу нив има и државјани на нашите земји. Судбината на заложниците и цивилното население во Газа, кои се заштитени со меѓународното право, ја загрижува меѓународната заедница“, се вели во соопштението.
Нагласено е дека договорот за ослободување на заложниците ќе донесе итен и продолжен прекин на огнот во Газа, што ќе овозможи доставување на дополнителна потребна хуманитарна помош низ Газа и ќе доведе до сигурен крај на непријателствата. Жителите на Газа, се додава, може да се вратат во своите домови и имоти со претходно направени подготовки за обезбедување засолниште и хуманитарна помош.
„Ние силно ги поддржуваме тековните посреднички напори за враќање на нашите луѓе дома. Го повторуваме повикот до Хамас да ги ослободи заложниците и да ни дозволи да ставиме крај на оваа криза, за да можеме заеднички да ги насочиме нашите напори за воспоставување мир и стабилност во регионот“, се наведува во соопштението.
