Русија го предупреди Западот дека ризикува да започне „директен воен конфликт“ со Русија и со други нуклеарни сили, пишува „Експрес“.
Рускиот министер за надворешни работи Сергеј Лавров испрати порака преку видео врска на конференција во Москва, каде предупреди дека рамнотежата на односите може опасно да биде загрозена.
– Западњаците опасно се приближуваат до работ на директен воен конфликт меѓу нуклеарните сили, што би имало катастрофални последици – рече Лавров.
Реакцијата доаѓа откако американскиот Претставнички дом конечно го усвои долгоочекуваниот пакет помош од 61 милијарда долари за Украина, што предизвика лут одговор од Русија. Во саботата, американските пратеници го одобрија пакетот, кој сега ќе оди на гласање во Сенатот во кој доминираат демократите, откако се соочија со жестоко противење од тврдокорните републиканци во Претставничкиот дом.
– Одлуката ќе ги направи Соединетите држави побогати, дополнително ќе ја уништи Украина и ќе резултира со смрт на уште повеќе Украинци, за што се виновни режимот во Киев – рече портпаролот на Кремљ, Дмитриј Песков во изјавата што ја пренесоа руските државни новински агенции.
Портпаролката на руското Министерство за надворешни работи Марија Захарова го повтори истото мислење на Телеграм.
– Доделувањето на воена помош од САД за Украина, Израел и Тајван ќе ја влоши глобалната криза – истакна Захарова.
Дмитриј Медведев, поранешниот руски претседател и актуелен заменик-претседател на рускиот Совет за безбедност, рече дека одобрувањето на новата помош за Украина е „русофобично“ и дека ќе го зголеми бројот на жртвите од војната.
– Не можам со сета искреност да не посакам САД да се втурнат во уште една граѓанска војна што е можно поскоро – изјави Медведев на Телеграм.
Предлог-законот се очекува да биде одобрен кон крајот на оваа недела, по што се очекува да го потпише и претседателот Џо Бајден.
