Постои растечка загриженост и во Украина и меѓу нејзините западни поддржувачи дека очекуваната руска офанзива ова лето би можела да ја пробие одбраната на земјата, објавија западните медиуми.
Киев со месеци се жали дека недостигот на оружје од Западот го ставил во огромна неповолна положба на бојното поле против Москва. Претседателот Владимир Зеленски минатата недела изјави за Вашингтон пост дека украинските сили можеби ќе треба дополнително да се повлечат за да ја намалат должината на линијата на фронтот и количината на муниција и луѓе потребни за да ја задржат.
– Ако (линијата) биде пробиена, Русите би можеле да одат во големите градови – предупреди тој.
Блумберг во средата објави дека односот на артилериските гранати истрелани од Русија во однос на Украина е зголемен од 3:1 на 7:1 од почетокот на годината.
Извори изјавија дека засегнатите странски донатори имаат намера да го подобрат соодносот на 7:3, бидејќи оружените системи донирани од Западот наводно се супериорни во однос на руските.
Украинските воени претставници кои разговараа за Политико под услов да останат анонимни предупредија дека линијата на фронтот може да биде пробиена. Предноста на Русија во оружјето и во воениот персонал значи дека земјата најверојатно ќе може „да навлезе во линијата на фронтот и да ја урне во некои делови“, рече еден од офицерите во средата.
– Нема ништо што може да ѝ помогне на Украина сега затоа што нема сериозни технологии кои можат да ѝ компензираат Украина за големата маса војници што Русија веројатно ќе ги фрли врз нас – рече висок воен лидер.
Предупредувањето дојде од офицерите кои служеа под Валериj Залужни, кој беше командант на украинските вооружени сили до почетокот на февруари кога Зеленски го смени од функцијата.
