Брзите возови кои веќе ги превезуваат граѓаните на Србија од Белград до Нови Сад, се чини дека уште долго нема да патуваат до Будимпешта. Лидерите на Србија и Унгарија, Александар Вучиќ и Виктор Орбан, претходно најавија дека за неколку години од едната до другата престолнина ќе се патува со воз за 2,5 часа.
Додека во Србија на проектот се работи интензивно, во Унгарија работите се стопирани поради проблемите на кинеските изведувачи во почитувањето на европските градежни стандарди, тврди српскиот портал Нова, повикувајќи се на неименуван соговорник.
Уште есента лани унгарските медиуми објавија дека кинеските изведувачи имале проблем со изградба на систем за безбедност и контрола на возот според европски стандарди, а во февруари оваа година пристигна информација дека дел од работата кај Будимпешта е прекинат.
Во февруари годинава еден унгарски портал објави дека работата на пругата кај Будимпешта е стопирана поради немање работни дозволи, пренесувајќи изјави на работници кои тврдечле дека можеби ќе треба да го демонтираат досега изграденото, бидејќи добиле официјална наредба веднаш да ја стопираат градбата.
Во економски кругови во Унгарија дури се спомнува дека Кинезите полека ја напуштаат целата инвестиција. Во унгарската јавност постои сериозен страв дека поради доцнењето земјата ќе остане во метеж кога е во прашање европскиот железнички сообраќај, бидејќи веќе се споменува можноста за отворање алтернативни линии над пругите во Хрватска и Словенија .
Кога станува збор за делот од пругата низ Србија, претседателот Вучиќ на крајот на декември 2023 година го посети вијадуктот кај Врбас и најави дека делницата од Белград до Суботица треба да биде готова до крајот на оваа година. Тој најави дека пругата кон Будимпешта ќе биде завршена во 2026 година.
„Од Белград до Суботица, од центарот до центарот, можете да стигнете со воз на најудобен можен начин за 75 минути. Од мај тие возови ќе ги имаме многу почесто на линијата Белград – Суботица, а од март 2026 година се надевам дека ќе бидат почести до Будимпешта и дека патувањето ќе трае 2,40 минути“, вети Вучиќ.
Проектот за изградба на брза железница Белград-Будимпешта, проценет на околу 2 милијарди долари во исто време, започна во 2014 година. Должината на пругата меѓу Белград и Будимпешта е околу 350 километри, од кои 184 километри се на територијата на Србија и 166 километри на територијата на Унгарија.
