Џорџ Робертсон, поранешниот шеф на НАТО, во интервју за Би-Би-Си, зборуваше за раните денови на владеењето на рускиот претседател Владимир Путин, кој во тоа време размислувал за евентуално вклучување на Русија во Алијансата.
– Путин со кој се среќавав, со кого добро работев, со кого го основав Советот НАТО-Русија, е многу, многу поинаков од овој сегашен мегаломан, изјави Лорд Робертсон за Би-Би-Си.
– Човекот стоеше покрај мене во мај 2002 година рече дека Украина е суверена и независна национална држава која ќе носи свои безбедносни одлуки, а сега тоа е човек кој вели дека Украина не е држава – додаде тој.
Лорд Робертсон потсети како рускиот лидер размислувал за НАТО.
– На вториот состанок отворено ме праша: „Кога ќе ја поканите Русија да влезе во НАТО? Му реков дека не покануваме земји, тие самите се пријавуваат, а тој ми одговори: „Па, нема да застанеме во ред покрај еден куп земји кои не се важни“.
Сепак, поранешниот шеф на НАТО не верува дека Путин навистина сакал да поднесе барање за членство.
– Тој сакаше тоа така да го претстави. Мислам дека тој секогаш мислеше, а сега уште повеќе мисли, дека Русија е голема нација на светската сцена и има потреба од почитта што ја имаше Советскиот Сојуз – додаде Робертсон.
