Австрија ги суспендира исплатите на Агенцијата за помош и работа на Обединетите нации (ОН) за палестинските бегалци на Блискиот Исток (УНРВА).
Како што се наведува, прекинот на исплатата продолжува се додека не се спроведе целосна истрага за наводите дека вработени во ОН биле вмешани во нападот на Хамас врз Израел на 7 октомври, соопшти денеска австриското Министерство за надворешни работи.
„Ги повикуваме УНРВА и Обединетите нации да спроведат сеопфатна, брза и целосна истрага за наводите“, се вели во соопштението на Министерството, пренесува Ројтерс.
Австрија им се придружи на Велика Британија, Германија, Соединетите Држави, Австралија и Канада, меѓу другите, во прекинот на финансирањето на агенцијата за помош, клучен извор на поддршка за жителите на Газа.
