Пејачот Елвис Присли повторно ќе оживее на сцената, како холограмска проекција на нов концертен спектакл.
Со подемот на вештачката интелигенција не само што ќе можеме да ги слушаме нашите омилени музичари кои веќе не се живи, туку и ќе имаме целосни концертни доживувања како вистински да се случуваат.
Проектот „Елвис Еволуција“ ќе биде лондонско шоу кое ќе го „оживее“ кралот на рокенролот. Дигитална верзија на Елвис Присли во природна големина ќе настапува на сцена, приредувајќи вистински спектакл за присутните.
Ова е понапредна верзија на веќе познатите холограмски проекции и виртуелната реалност, бидејќи ќе вклучува и сензорни ефекти, со цел да се пружи поавтентично искуство за оние кои никогаш немале шанса да го гледаат Елвис во живо.
За да се реализира проектот биле користени архивски видео инсерти и фотографии. Прва можност да се види ова шоу ќе биде веројатно ноември оваа година. Со тоа, ќе се доближи значењето и важноста на Елвис Присли до помладата публика, но и ќе се негува културното богатство кое тој го остави.
