Стечајните работници од поранешната фабрика за производство на мебел „Треска“ кои бараат исплата на придонесите во период од 18 месеци и исплата на заостанати плати за период од 2 години, немаат никаква врска со имотот на фабриката, тврдат сопствениците на приватните градежни парцели на имотот на поранешна „Треска“, откако во јавноста излегоа информации дека тие го поседуваат имотот на фабриката „Треска“.
– Ние сопствениците на приватни парцели на имотот кај поранешната фабрика „Треска“ сакаме да ја потсетиме јавноста дека нема никаков имот во стечајната маса на „Треска“, ниту ние сме купиле имот од оваа стечајна маса. Оттука, категорично ги отфрламе тезите дека стечајните работници имаат било каква поврзаност со имотот на фабриката и дека ние како нејзини сопственици имаме обврска да ги исплатиме нивните долгови- велат група сопственици на градежни парцели- Треска.
Тие потсетуваат дека за локацијата е воден 20 – годишен судски спор по кој најголемиот дел од имотот, 92% му припадна на едно лице по пат на денационализација, додека само 8% влегоа во стечајната маса, од која беа обесштетени дел од вработените.
„Исплата на средства и стаж добија само вработени во „Треска мебел“, додека оние кои работеле во останатите 7 друштва на фирмата „Треска“ не добиле никакви средства. Причината за ова лежи во тоа што друштвата биле формирани од „Треска мебел“, но без никаков имот“, појаснуваат тие.
Сопствениците на градежните парцели ги советуваат стечајците правата да ги бараат кај стечајниот управник.
„Затоа, за сите одговори, нејасностии и исполнување на работничките права ги упатуваме стечајните работници да ги побараат од институциите и стечајниот управник кој ја извршил продажбата на оваа некогашна индустриска сила“, наведуваат тие во соопштението.
