Анализата на „Вашингтон пост“ покажа дека Израел користел муниција од бел фосфор купена од САД во нападот во октомври на југот на Либан, кога девет цивили беа ранети во населбата Деира.
Новинар кој работи за тој американски весник пронашол остатоци од три артилериски гранати од 155 милиметри кои изгореле четири куќи во таа либанска населба во близина на границата со Израел.
Чадот од многу запалива муниција од бел фосфор се користи за да се сокријат движењата на армијата. Сепак, зрната од овој вид фосфор може да предизвикаат потенцијално фатални изгореници и оштетување на белите дробови, а употребата на оваа муниција е забранета со меѓународното хуманитарно право во цивилни области, наведува американскиот весник.
Од деветте ранети во израелскиот напад на либанска населба, најмалку тројца се хоспитализирани, од кои еден со денови.
Фотографиите и видеата потврдени од Amnesty International и прегледани од Вашингтон пост покажуваат карактеристични ленти од бел фосфорен чад што паѓаат на Деира на 16 октомври.
Ознаките на остатоците од гранати одговараат на номенклатурата што ја користи американската армија за домашно произведена муниција, а светло зелената боја и другите ознаки на еден од остатоците од граната одговараат на муниција со бел фосфор, велат воени експерти.
„Вашингтон пост“ потсетува дека САД редовно му даваат воена помош на Израел.
Прекуграничните судири на јужната граница на Либан се секојдневни од почетокот на војната меѓу Израел и палестинскиот Хамас во Газа.
Во фокусот на конфликтот е населбата Деира со околу 2.000 луѓе, бидејќи проиранскиот либански Хезболах оттаму ги напаѓа израелските воени точки.
Во Либан до 5 декември загинаа 94 лица, од кои 82 членови на Хезболах, а во Израел 11 лица, главно војници.
