Бугарија да ги гарантира правата на малцинствата на нејзината територија вклучително и тие на македонското малцинство и да ги отстрани сите бариери за регистрација на Македонците, пишува во последниот извештај на Комитетот за елиминација на дискриминација на ОН.
Комитетот бара од официјална Софија да соработува со малцинствата. Во извештајот се наведува и загрижувачки тренд да се ставаат пречки при регистрирањето на македонските здруженија од страна на Агенцијата за регистрација и од судовите.
„Комитетот го зема предвид објаснувањето од делегацијата на државата членка дека сите нејзини граѓани имаат право на самоидентификација вклучително и Македонците. Но комитетот е загрижен поради извештаите дека на членовите на македонските малцински групи им е забрането слободното остварување на правото на слободно собирање и здружување“, велат оттаму.
Исто така Комитетот препорачува државата членка да ги разгледа сите средства за гарантирање на човековите права за македонското малцинство преку спроведување на пресудите на Европскиот суд за човекови права релевантни на правото на слобода на изразување и слобода на здружување.
