Граѓаните во Македонија веќе некое време ги коментираат сателитите Старлинк на милијардерот Илон Маск. Тоа се група сателити кои во линија орбитираат околу Земјата. Реакциите на овој феномен на небото се најразлични. Последните објави на Фејсбук сугерираат дека Старлинк биле видливи од Охрид во неделата.
Меѓу другото, ова на Фејсбук го објави и Охридската астрономска асоцијација.
„Сателитите СтарЛинк на Илон Маск вечерва прелетаа на југозападната страна од Охрид како што можеме да забележиме на една од веб камерите на www.ohridinfo.tv. Поради ведрото време, јасно можеше да се види возот од сателити, кои се во фаза на распоредување на висина од 420км над земјата.
Нивната цел е да достигнат висина од 544 км, да се распоредат во веќе постоечката мрежа од повеќе од 3.500 сателити која емитува глобален супер-брз интернет на земјата“.
А, како тоа го коментираат граѓаните?
„Видовме еден ред ЅВЕЗДИ (околу 7,8) се појавија на небоно, се движеа во линија околу 30 секунди и ОП исчезнаја…..дали некој друг го виде то чудо? Видено на југо-запад од Охрид Видобишча!“, корисникот Wik Kakarotski.
Под објавата следеа реакции на охридски говор:
„Старлинкон од Илон Маск“,
„Сношти ги видов ама појќе беа Демек старлинкс…“,
„Видени се, сателитите од Илон Маск се, е сега шо прает, како прает…….?????“,
„Дедо Мраз почна да шетат бате“,
„Знак некој ви дават“…
Самата компанија Старлинк на својот вебсајт нуди и информации за тоа кога и каде сателитите ќе бидат видливи од местото кадешто живеете.
