Автомобилскиот отпад и милиони стари гуми се проблем во многу земји во светот, но во Нигерија, земја позната по извозот на нафта, најден е ефикасен начин како да се ослободат од отпадот и да го претворат во „црно злато“.
Претприемачката Ифедолапо Рунсеве ја препозна вредноста на стариот отпад од автомобили и го основа Freetown Waste Management Recycle, индустриски објект посветен на трансформирање на старите гуми во калдрма, подни плочки и други производи кои се многу барани во најнаселената земја во Африка.
– Создавањето нешто ново од нешто што инаку би завршило како отпад е дел од мотивацијата. Успеавме да создадеме цел синџир на вредност околу гумите – изјави Рунсеве за Ројтерс во нејзиниот објект во југозападниот нигериски град Ибадан.
Во Нигерија, управувањето со отпад често е несигурно. Во селата, градовите и градските населби купиштата ѓубре се вообичаена глетка, а жителите често го палат отпадот во отсуство на побезбеден начин за негово отстранување. Гумите често едноставно се фрлаат или се оставаат зад себе. Фритаун се потпира на чистачите кои собираат стари гуми од дивите депонии и се платени помеѓу 70 и 100 наири (околу 0,08 – 0,12 евра) за секоја гума. Некои гуми исто така се испорачуваат директно од механичарите.
Фритаун започна со работа во 2020 година со само четворица вработени, а растот беше толку брз што работната сила порасна на 128 луѓе. Досега се рециклирани повеќе од 100.000 гуми, претворајќи ги во сè, од легнати полицајци до меки подови за детските игралишта.
Овој пример покажува дека е можно да се најдат одржливи решенија за големите еколошки предизвици и дека учењето од таквите примери може да послужи како инспирација за другите земји да најдат креативни начини за управување со отпадот.
