Американскиот претседател Џо Бајден прво изјави во вторникот дека рускиот претседател Владимир Путин извршил „геноцид“ во Украина, додавајќи дека конечната одлука ќе ја донесат адвокатите на меѓународно ниво.
Бајден го употреби терминот „геноцид“ во говорот во фабрика за етанол во државата Ајова, а подоцна се задржа на тие квалификации додека се подготвуваше да се качи во авионот. „Да, јас го нареков геноцид. Но, ќе дозволиме адвокатите на меѓународно ниво да одлучат дали ќе го квалификуваат на тој начин или не, но мене така ми се чини“, им рече Бајден на новинарите.
Претходно американскиот претседател масакрот во украинскиот град Буча го нарече „воено злосторство“.
Во Ајова, Бајден коментираше за зголемувањето на цените на горивото и зголемувањето на инфлацијата, која е на највисоко ниво во САД во последните четири децении. Тој рече дека високата инфлација во неговата земја е предизвикана од војната што Русија ја води против Украина и посочи дека американскиот Конгрес работи на нејзино намалување.
Тој исто така рече дека САД ќе продаваат по еден милион барели нафта дневно од стратешките резерви за да ги намалат цените на горивата ширум светот, а слични чекори преземаат и други земји. „Вашиот семеен буџет, способноста да се наполни резервоар за автомобил не треба да зависи од тоа дали диктаторот од другата страна на светот ќе објави војна и ќе изврши геноцид“, рече Бајден.
