Владата преку Законот за финансиска поддршка на инвестициите од неговото воведување до денес поддржа 919 компании со 100 милиони евра. За 6 години финансиската поддршка од државата кон домашните компании е зголемена за 11 пати од 3,2 милиони евра во 2018 година, до 35 милиони евра во 2023 година, рече премиерот Димитар Ковачевски во обраќањето на настанот #МКЕкономија „Довербата расте” наменет за компаниите корисници по Законот за финансиска поддршка на инвестиции.
-Речиси 150 милиони евра изнесува буџетската поддршка за домашните и странските компании годинава или 5 пати повеќе во споредба со периодот од пред 5 години. Директните субвенции во стопанството по основ на инвестиции, но и врз основа на други програми од 1,9 милијарди денари во 2017 година се покачија на 7,76 милијарди денари годинава – рече Ковачевски
Тој додаде дека инвестициската положба на земјата се подобрила со НАТО, а уште подобри резултати ќе има со влезот во ЕУ, кога како што рече, ќе забележиме највисок раст во регионот.
– Убеден сум дека дента кога ќе станеме дел од ЕУ нашата држава и нашиот регион ќе бидат држава и регион со највисоки стапки на економски раст во однос на сите други сегашни земји-членки на ЕУ – рече Ковачевски.
Вицепремиерот за економски прашања Фатмир Битиќи кој исто така зборуваше пред претствници на околу 500 компании, рече дека не изостанала поддршката и на домашните компании.
– До 2017 година имавме нула поддржани домашни компании од страна на Владата, денеска поддржуваме 919. Овој подвиг е 100-отсто партнерски и Ви се заблагодарувам за вашата посветеност и истрајност, им рече Битиќи на присутните на претставници на компании на настанот.
Тој нагласи дека очекува преку оваа поддршка да продолжи позитивниот тренд на развојот на сите региони во државава и додаде дека со растот на бројот на компании кои инвестираат и доследното инвестирање во Буџетот заедно се гради довербата во овој механизам.
-Во 2018 година беше исплатена поддршка на 73 домашни компании во висина од 3,2 милиони евра, на крајот на 2022 година се исплатени 23 милиони евра кон 410 компании, а годинава се буџетирани околу 35 милиони за исплата. Од јануари до септември годинава, пак, се исплатени 31 милијарда денари или 510 милиони евра за поврат на ДДВ за компаниите – рече тој.
На настанот се одржа и инфо сесија за компаниите со процедурите за користење на поддршката од Законот, а дел од компаниите ги презентираа и резултатите од нивните инвестициски циклуси како и резултатите од поддршката од Владата преку Законот за финансиска поддршка на инвестициите.
Законот за финансиска поддршка на инвестициите е донесен во 2018 година. Со Владина поддршка за домашните компании од 2018 до 2023 година се поддржани 919 компании со 100 милиони евра.
