За покривање на дополнитените расходи кои ги наметнала енергетската криза во 2022 година Владата жртвувала проекти од најмалку 170 милиони евра, а граѓаните се оштетени со 220 милиони евра кои би биле употребени за подобрување на нивниот живот.
Ова се констатира во последното истражување за последиците од зголемените буџетски трошоци од кризата во 2022 година врз области кои влијаат врз животот на граѓаните за кое се дебатираше денеска.
Сабина Факиќ од Центарот за граѓански комуникации информира дека станува збор за проекти како реновирање на здравствени установи, купување медицинска опрема, изградба на детски градинки и домови за стари лица, изградба на патишта, реконструкција на студентски домови, како и проекти за унапредување на животната средина.
-Кога кон овој износ ќе се додат и 50 милиони евра капитални проекти кои требало да се реализираат од локалните власти, произлегува дека граѓаните се условно кажано оштетени за 220 милиони евра кои требало да придонесат кон подобрување на нивниот квалитет на живот – рече таа.
Мерките влијаеле и за задолженоста на сите институции, според Факиќ, е зголемена за 30% и изнесува 800 милиони евра.
-Многу е важно да настојуваме товарот на зголемените трошоци да не паѓа толку на граѓаните, туку да влијае и на привилегиите кои за себе си ги обезбедуваат функционерите – рече Факиќ.
Истражувањето покажало и дека за да се прикрие ударот на енергетската криза врз капиталните инвестиции во 2022 година, дури 28% од капиталните расходи односно 130 милион евра биле потрошени за исплати кои не може да се сведат под категоријата „капитални“.
Факиќ потенцира дека тука станува збор за дел од исплатите 378 милиони евра кон АД Електрани за надминување на енергетска криза, како и плаќања на гаранции по рати за кредити на државните претпријатија.
