Годишнина од војната меѓу Грузија и Русија, Тбилиси вели – окупираше 20 отсто од територијата
Грузискиот претседател Саломе Зурабишвили изјави дека Руската Федерација продолжува да окупира 20 отсто од територијата на нејзината земја.
Зурабишвили на својот профил на социјалните мрежи објави писмена изјава по повод 15-годишнината од војната во Јужна Осетија меѓу Русија и Грузија во 2008 година.
Нагласувајќи дека Грузија ќе го обезбеди својот територијален интегритет преку мирни методи, Зурабишвили изјави дека Русија е агресор и окупатор и дека петнаесет години по војната во 2008 година, таа сè уште окупира 20 отсто од територијата на Грузија, игнорирајќи ги сите меѓународни принципи.
На 15-годишнината од војната, грузискиот премиер Иракли Гарибашвили ги посети „Братските гробишта“ во Мукатгверди во близина на Тбилиси и положи венец.
Давајќи изјава за новинарите, Гарибашвили изрази благодарност до оние кои ги дадоа своите животи во војната.
„Нашата главна борба е да ставиме крај на оваа окупација. Знаевме и го знаеме фактот дека Русија е окупатор и агресор, тоа го знае целиот свет“, рече тој.
Тој изјави дека е можно да се врати територијалниот интегритет на Грузија преку мирни средства.
„Пријатели, нема алтернатива за мирот. Мораме да ја вратиме нашата територија во мир, со нашата коректна, паметна и прагматична политика. Верувам во ова со целото мое срце. Секој ден сме се поблиску до оваа голема цел“, нагласи премиерот.
Прашањето за Јужна Осетија и Абхазија
Од 1992 до 1993 година, се водеше тринаесетмесечна војна меѓу грузиската армија и абхазиските сепаратисти поддржани од Русија.
Конфликтите меѓу Русија и Грузија, познати како Јужноосетска војна, избувнаа во 2008 година, а по војната, регионите Абхазија и Јужна Осетија, со поддршка на Русија, еднострано прогласија независност од Грузија.
Во 2008 година, Русија ја призна таканаречената независност на овие два региона, додека Грузија пак ги прекина дипломатските односи со Руската Федерација.
По раскинувањето на дипломатските односи меѓу двете земји, улогата на посредник ја презеде Швајцарија.
