Рускиот парламентарец и резервен генерал-полковник Андреј Картаполов изјави на државната телевизија дека Владимир Путин планира да го искористи Вагнер за да го нападне стратешки важниот коридор Сувалки.
Имено, овој појас од околу сто километри се протега долж границата меѓу Полска, Литванија, Белорусија и Русија. Да се има контрола над тоа значи и да се има цврсти основи за можен конфликт од пошироки размери од оној во Украина. Затоа е важно не само за Русија туку и за НАТО.
„Вагнер е подготвен да дојде на таа територија за само неколку часа“, вели Картаполов, близок пријател на Путин, пишува „Дејли мејл“.
Полската разузнавачка служба, пак, ги следи движењата на Вагнер и засега не ја потврдиле заканата.
„Досега ги има неколку стотици во Белорусија“, потврдија Полјаците.
Секако, во наредниот период коридорот ќе биде исклучително важен за сите страни, за Русите поради него во одбранбена смисла, но и како темел за идни можни дејствија, додека за сојузниците на Украина тој е единствената копнена врска со три поранешни советски балтички републики – Литванија, Латвија и Естонија. Тие се сметаат и за најранливи во случај на конфликт од поголеми размери.
За Русија, контролата на коридорот ќе обезбеди копнена врска помеѓу балтичката ексклава Калининград, главната база на балтичката флота на Путин, и цврстиот сојузник на Кремљ, Белорусија.
Исто така, Картаполов тврди дека Сувалки е „Ахиловата пета на НАТО алијансата“. И поради „интересот“ на сите страни да воспостават контрола врз него, моментално се смета за најопасното место на светот. А некои веќе го означуваат како „појдовна точка на Третата светска војна“.
Јасно е и зошто Вагнер се користи за евентуална акција. Станува збор за платеници, а не за претставници на државните воени сили, во случајов руски. Со тоа се оневозможува иницирање на клаузулата 5 од НАТО алијансата, која би била „тригер“ за директен конфликт со Русија.
Сепак, Полска брзо се вооружува поради заканата од Москва, а Германија ќе распореди 4.000 војници во Литванија додека НАТО го зајакнува своето присуство во балтичките земји.
Исто така, овие таргетирани телевизиски пораки доаѓаат помалку од 24 часа откако Путин потврди дека Русија има доволно залихи на касетна муниција, што тој се закани дека ќе ги користи доколку Украина ги распореди на бојното поле.
Руските закани и триумфалистички пораки пристигнуваат од ден на ден, засилени со фактот дека украинската контраофанзива не покажува значителен напредок. Односно, според Путин, тоа не успеа и беше целосно запрено.
„Во текот на целото времетраење на офанзивата, непријателот не беше во можност да ја пробие нашата одбрана“, рече рускиот претседател на државната телевизија во неделата.
