Обилните врнежи од дожд во регионот на Црното Море во Турција предизвикаа поплави и лизгање на земјиштето, а едно лице загина во северната турска провинција Самсун, изјави во понеделник министерот за транспорт Абдулкадир Уралоглу.
Неколку патишта беа затворени поради лизгање на земјиштето, додаде тој, според државната новинска агенција Анадолу.
Во провинцијата Болу е закопан излезот од тунелот. На снимката се гледаат багери кои се обидуваат да го исчистат патот. Метеоролошката служба предупреди и на ново невреме во регионот на Црното Море.
Црноморскиот регион е постојано изложен на големи поплави. Турскиот претседател Реџеп Таип Ердоган изјави во понеделникот дека екстремните временски услови се резултат на климатската криза.
„За жал, како и остатокот од светот, нашата земја се повеќе ги чувствува проблемите предизвикани од климатските промени“, рече Ердоган во Истанбул.
