Украина е подготвена да започне долгоочекувана контраофанзива за враќање на територијата под руска окупација, изјави претседателот Володимир Зеленски во интервју објавено денеска.
Цврсто веруваме дека ќе успееме“, изјави Зеленски за Волстрит журнал.
„Не знам колку долго ќе трае. Да бидам искрен, тоа може да се случи на различни начини, сосема различни. Но, ние ќе го направиме тоа и подготвени сме“.
Киев се надева дека контраофанзивата за враќање на територијата ќе ја промени динамиката на војната што беснее откако Русија го нападна својот помал сосед пред 15 месеци. Зеленски минатиот месец рече дека Украина мора да почека да пристигнат уште западни оклопни возила пред да започне контраофанзива.
Тој направи дипломатски напори да ја задржи поддршката од Западот, барајќи поголема воена помош и оружје, кои се од суштинско значење за Украина да успее во нејзините планови. Русија држи делови од украинската територија на исток, југ и југоисток.
Долгиот период на суво време во некои делови на Украина ги поттикна очекувањата дека може да биде неизбежна контраофанзива. Во текот на изминатите неколку недели, Украина ги засили нападите врз руските складишта за муниција и логистичките рути.
Во саботата, украинската армија во дневниот извештај објави дека Марјинка во областа Доњецк на исток била во фокусот на борбите. Украинските сили ги одбија сите 14 напади на руските сили таму, се вели во извештајот.
