Теренс Дарел Кели (37), кој призна дека ја киднапирал четиригодишната Клео Смит во октомври 2021 година, судот го прогласи за виновен. Тој беше осуден на повеќе од 13 години затвор.
При изрекувањето на казната, судијката Џули Вагер укажа на тешкото воспитување на 37-годишниот Теренс Дарел Кели, но истовремено нагласи дека, според мислењето на експертите, постои ризик тој да го повтори делото. Судот го прогласи Кели за виновен по неговото признание и го осуди на 13 години и шест месеци затвор, јавува Би-Би-Си. Според проценката на психијатарот кој учествувал во случајот, Кели боледува од тешко растројство на личноста, пренесува новинската агенција Ројтерс.
Кели пред судот признал дека се чувствува виновен и дека немал намера да ја задржи девојката и покрај киднапирањето. Како дете, Кели бил изложен на тешка траума што го оставила со невролошко оштетување. Тој создал фантастичен свет за да се заштити од реалноста, а користел и метамфетамин, објави судот, пренесе Би-би-си.
Да потсетиме, во октомври 2021 година, Смит исчезна од семејниот шатор во камп во близина на градот Карнарвон. Нејзините родители последен пат ја виделе во два и пол часот наутро кога побарала чаша вода. Кога се разбудиле во шест наутро, девојката повеќе не била во шаторот, а вреќата за спиење ја немало. Родителите прво самите го побарале девојчето, но кога не го нашле во близина повикале полиција. Властите веднаш започнаа масовна операција за пребарување, нудејќи награда од еден милион австралиски долари или 640.000 евра за каква било информација поврзана со исчезнувањето. Спасувачките тимови користеа и беспилотни летала и возила на четири тркала во потрагата на тешко пристапен терен.
По 18 дена, полицијата го пронашла девојчето заклучено во куќа во нејзиниот роден град Карнарвон, во близина на местото каде што семејството кампувало. Важна информација за неговиот автомобил ја навела полицијата до Кели. Локалните медиуми објавија дека таа, исто така, направила пробив кога пронашла број на мобилен телефон во моментот на киднапирањето и го поврзала со телефонска кула во близина на кампот.
