Обвинителите треба веднаш да отворат постапка за аферата поврзана со надзорот на изградбата на Коридорот 8 и Коридорот 10Д – во спротивно ќе треба да одговараат зошто молчеле за скандалите поврзани со Груби и Ковачевски – изјави Бојан Стојаноски, пратеник од ВМРО-ДПМНЕ во гостување на емисијата „Заспиј ако можеш” што се емитува на телевизија Алфа.
Тој посочи дека со вицепремиерот Артан Груби се поврзани неколку скандали објавени во јавноста.
– Со Груби е поврзано купувањето дуќан во центарот на Скопје за многу пониска цена од пазарната, потоа отуѓување на хотел на Попова Шапка и доаѓаме до третиот скандал поврзан со фирмата, луѓето кои треба да прават надзор на фирмата која ќе ги изведува Коридорот 8 и Коридорот 10Д – рече Стојаноски.
Стојановски најави дека и во наредниот период ќе следат скандали поврзани со вицепремиерот. Според Стојаноски крајно време е надлежните институции да реагираат за сите афери, но, вели тој, како да се очекува Ислам Абази, кој е обвинител за гонење на организиран криминал да почне постапки, кога е близок со врвот на ДУИ.
Осврнувајќи се на последниот скандал со надзорот на изградбата на Коридор 8 и Коридор 10Д, Стојаноски укажа дека ВМРО-ДПМНЕ сака сите документи да ги приложи на јавноста. Исто така рече тој, јавното обвинителство го повикавме да реагира и да отвори истрага за конзорциумот ИРД – Ептиса – Електра Солушн – Евро Консталтинг.
– Еден ден обвинителите ќе треба да одговорат зошто не постапувале по одредени предмети и ќе треба да објаснат зошто молчеле – рече Стојаноски.
Тој истакна дека последниот скандал е школски пример како се мести тендер.
– Најголемиот дел од парите одат кај Електра Солушн, која вади лиценца во сред јавен повик. Електра Солушн која поднесува барање за издавање на лиценца за надзор по отворање на повикот за прибирање на понуди и добива лиценца во тек на јавниот повик. Оваа фирма Електра Солушн ќе земе 8.2 милиони евра од тендерот од 22 милиони евра – рече Стојаноски.
Стојаноски објасни дека во целата постапка надзорот е најважен, бидејќи врз основа на надзорот се ефектуираат фактурите, колку треба да се плати.
