Продавниците сепак, нема да работат за божикните празници иако имаше препорака недела и понеделник да бидат работни за трговците на мало. Министерството за труд и социјална политика соопшти дека Владата на денешната 216-та седница ја променила препораката за работа во недела и за време на божикните празници во трговијата на мало, донесена на 214-та владина седница.
„Имено, Владата го разгледа и прифати посочувањето на Министерството за труд и социјална политика, дека 7 јануари (недела) и 8 јануари (понеделник) се неработни денови, согласно Законот за празниците на Република Северна Македонија.
Владата на денешната седница одлучи да престане да важи препораката за работа на 7 и 8 јануари 2024 година на продавниците, штандовите и киосците кои вршат трговија на мало за време на божикните празници“ – стои во известувањето од Министерството за труд и социјална политика.
