18-годишна студентка на шкотскиот универзитет Абердин и нејзината мајка ќе отпатуваат во вселената оваа недела, откако на лотарија освоија место на вториот комерцијален лет на Вирџин Галактија.
Анастатија Мајерс и нејзината мајка Кеиша Шахаф ќе бидат првите мајка и ќерка кои летаат во вселената. Тие, исто така, ќе бидат првите луѓе од Карибите кои ќе тргнат на тој пат. Полетувањето е во четврток од Ново Мексико.
Кеиша била на пат за Велика Британија за да и договори виза за студирање на нејзината ќерка, а на летот од Антигва до Лондон одеднаш видела оглас за наградно патување во вселената.
– Ја пополнив наградната ждрепка и потоа одеднаш, неколку месеци подоцна, добивам дописи во кои пишува „ти си меѓу избраните 20 финалисти“, потоа меѓу првите пет и на крајот дека јас сум победничката. И, одеднаш, кој влегува во мојот двор? Ричард Бренсон! Целиот тим само упадна во мојата куќа велејќи „ти си победникот, ќе одиш во вселената“ – раскажува Кеиша Шахаф.
Анастатија вели дека нејзината одлука да патува од Карибите за да студира во Шкотска довела до можност да оди во вселената.
– Да не го избрав по случаен избор Универзитетот во Абердин и да не моравме да направиме огромно заобиколување за да ја добиеме мојата виза – немаше да одиме во вселената – вели таа.
Студентката која студира филозофија и физика, вели дека одењето да студира во Шкотска било една од најголемите одлуки во нејзиниот живот, но за неа донело и многу други прекрасни работи.
Мисијата, наречена Галактик 02, е вториот комерцијален лет на Вирџин Галактика во вселената и прв со клиенти кои плаќаат. Огласената цена беше 450.000 долари.
Мисијата Галактик 01 беше спроведена во јуни и достигна височина од 85 километри. Се смета дека втора мисија ќе се обиде да го следи истиот пат.
Анастатија, која ќе биде втората најмлада личност која ќе отиде во вселената, вели дека се надева дека може да го искористи искуството за да ги инспирира другите.
– За мене и мојата ќерка заедно, тоа е повеќе од остварување на сонот – вели Кеиша.
