Американскиот фармацевтски гигант Фајзер е подготвен да и достави на Европската унија помалку вакцини против Ковид 19, со продолжен рок на испорака, објави Фајненшл тајмс, повикувајќи се на информирани извори.
„Фајзер“ е подготвен да го намали бројот на дози што ги испорачува за 40 проценти и да ги одложи испораките и бара од ЕУ да плати за нарачаните дози што нема да бидат произведени, објави ФТ во вторникот.
Договорот за набавка на вакцини ќе биде продолжен за три години, до 2026 година.
„Со заедничка работа, постигнавме значително намалување на дозите, продолжување на нашиот договор многу повеќе од 2023 година и сигурно снабдување доколку бидат потребни дополнителни дози“, рече европската комесарка за здравство Стела Киријакидес.
„Ако сакаме да ги промениме испораките на вакцини, мора да се договориме“, додаде Киријакидес.
Новите услови беа претставени пред министрите за здравство на ЕУ на приватен состанок, се вели во извештајот, а на нив се спротивставија четири земји-членки, меѓу кои и Полска.
Бугарскиот министер за здравство Асен Меџидиев рече дека неговата земја, Полска, Унгарија и Литванија се против предложениот договор за вишок вакцини.
Меџидиев додаде дека верува оти другите членки на ЕУ нема да го поддржат предложениот договор во сегашната форма.
„Амандманот предложен од Pfizer (…) е очигледно неприфатлив за нас, со оглед на критичната состојба со прекумерните залихи на вакцини во Бугарија и неоправданото финансиско оптоварување за производите наменети за уништување“, рече Меџидиев.
„Ја покануваме Комисијата да се врати на преговарачка маса, имајќи го целосно предвид мандатот што го доби. Додека не се најде решение, мора да се прекинат сите испораки“, рече тој.
Pfizer не одговори веднаш на барањето за коментар.
Ројтерс објави за разговорите на Брисел со Pfizer и нејзиниот германски партнер BioNTech во јануари, во услови на глобална презаситеност од вакцини за Ковид-19. Проблемот со прекумерните залихи е особено изразен во Европа.
Преговорите ја вклучија можноста Pfizer да ја намали за 500 милиони понудата на дози што ЕУ се обврза да ги купи оваа година, а за возврат ЕУ да плати повисока цена, наведува Ројтерс.
