Смртта на музичкиот великан Масимо Савиќ го погоди целиот регион. Од пејачот се простија многу колеги и пријатели, а со денови пристигнуваат емотивни пораки. Беба Балашевиќ, ќерка на легендарниот кантавтор Ѓорѓе Балашевиќ, сподели демо снимка од песната „Minut ćutanja“, која била наменета за Масимо.
„Немав многу разговори со Масимо, мислев дека тоа штотуку ме чека и тоа ме радуваше бидејќи станува збор за многу интелигентен, талентиран, луциден и имагинативен човек. Уметник, кој покрај својата бескрајно интересна личност, има уште една многу скапоцена работа во неговиот живот, а тоа е љубовта меѓу него и неговата сопруга“, напиша таа во описот на објавата на Фејсбук.
Таа ја опишала песната како љубовна и открила дека зборува за тоа како, според нејзините зборови, „од животот ќе се смета само времето поминато со некој што го сакате, а сѐ друго ќе може да се смести во минута молчење“.
„И тогаш реков, а и сега ќе кажам, таа песна е само за него и за никој друг. Ми се јави и ја отпеа неговата верзија на рефренот, а јас со задоволство слушав како песната добива вредност што само неговиот единствен глас може да го даде. За жал, нема да можам да ја слушнам во целост во негова изведба. Сега само ми останува да замислам како звучи кога тој ја пее и, ако ме прашате мене, звучи магично“, заклучила таа.
Масимо почина на 61-годишна возраст по кратка битка со ракот. Веста за неговата смрт ја споделија неговата сопруга и ќерката, а многумина беа изненадени од неговото заминување. Комеморацијата за музичкиот великан ќе се одржи в петок, во 11 часот, во Хрватскиот народен театар во Загреб. Погребот ќе биде во Задар.
ФОТО: Фејсбук
