Аргентинскиот интернационалец и актуелен светски шампион Енцо Фернандез е новото засилување на Челзи.
По неколкудневните преговори помеѓу Бенфика и клубот од Лондон, се чини дека се е јасно и дека Фернандез ќе стане едно од најскапите засилувања во историјата на Челзи.
Според информациите на светските медиуми, сините ќе му платат на португалскиот клуб 127 милиони евра за новото засилување, што ќе биде петти најголем трансфер досега. Исто така, доаѓањето на Фернандез ќе го собори рекордот кој претходно го држеше Џек Грилиш кога се пресели во Манчестер Сити.
Најдобриот млад фудбалер на Мундијалот во Катар ќе заработува 10 милиони евра по сезона, а со Челзи ќе потпише договор на пет и пол години. Така Бенфика ќе инкасира огромна сума на пари, а на тоа ќе се радува и поранешниот клуб на Фернандез, Ривер Плата, кој ќе добие 25 отсто од вкупната сума.
