Џими Кимел повторно ќе биде домаќин на Оскарите во 2023 година, објавија организаторите денеска, избирајќи го водителот ветеран да ја додели најпрестижната награда во Холивуд една година откако актерот Вил Смит му удри шлаканица на минатогодишниот водител Крис Рок на церемонијата.
Академијата за филмски уметности и науки се надева дека Кимел, популарниот американски комичар и водител на ток-шоу во доцните часови, кој беше домаќин на Оскарите во 2017 и 2018 година, ќе помогне да се зголеми ТВ гледаноста на овој настан по минатогодишниот испад на Смит.
Пренесот на доделувањето на престижните Оскари беше емитуван на мрежата „Еј-би-си Волт Дизни ко“, ја забележа втората најниска гледаност во својата историја, а снимката од Смит како му удира шлаканица на Рок на сцената откако комичарот се пошегува на сметка на сопругата на актерот, беше споделена на социјалните мрежи и со денови доминираше на насловните.
„Да се биде поканет за домаќин на Оскарите по трет пат е или голема чест или стапица. Во секој случај, благодарен сум на Академијата што ми го постави прашањето толку брзо откако сите добри момчиња одговорија негативно“, им рекол Кимел на новинарите.
Церемонијата ќе се одржи на 12 март во театарот „Долби“ во Лос Анџелес.
„Џими е совршен домаќин кој ќе ни помогне да препознаеме неверојатни уметници и филмови на овогодинешното 95-то доделување на Оскарите“, стои во соопштението на директорот на Академијата Бил Крамер и претседателката на Академијата Џенет Јанг.
