Седумте најмоќни земји од групата Г7 нема да можат да ја ограничат цената на нафтата ако притоа не им се приклучат големите земји во развој и нивните пазари, оценува Светската банка во свое соопштение. Банката додава дека сѐ зависи од тоа како земјите ќе се снабдуваат со нафта и од степенот до кој извозот на Русија ќе биде повлијаен од новите трговски „санкции“, пишува РТ.
„Предложеното ограничување на цената на нафтата на Г7 може да влијае на протокот на нафта од Русија, но тоа е непроверен механизам и ќе треба учество на големите пазари во развој и економиите во развој за да ги постигне своите цели“, се вели во извештајот.
Се додава дека иако на краток рок може да дојде до значително нарушување на извозот на Русија бидејќи трговските патишта се нарушени, „учесниците на пазарот може да најдат начини да ги заобиколат санкциите, како што често се случувало со други епизоди на санкции“.
Групата седум водечки економии – САД, Канада, Франција, Германија, Италија, Велика Британија и Јапонија – се согласија минатиот месец да воведат плафон на цената на руската нафта во обид да ги ограничат приходите на земјата од извозот на енергија. Ограничувањето на цената сè уште не е одлучено.
Според планот, на банкарските, осигурителните и бродските фирми ќе им биде забрането да даваат услуги на руски компании кои продаваат нафта по цена над утврдената граница. На 5 декември, исто така, истекува рокот за ЕУ да го забрани целиот увоз на руска сурова нафта преку море.
Москва соопшти дека нема да извезува нафта во земјите кои учествуваат во ограничувањето на цената.
