САД денеска соопштија дека Русија е на раб да изврши масовен воен напад против Украина, отфрлајќи ги тврдењата на Москва дека ги повлекува силите, бидејќи во артилериски оган беше погодена украинска градинка.
Во драматичен, претходно непланиран говор во СБ на ОН во Њујорк, американскиот државен секретар Антони Блинкен рече дека разузнавачките служби покажале дека Москва може да нареди напад врз својот сосед во „наредните денови“.
Со оглед на тоа што САД и другите западни влади рекоа дека не гледаат докази за поддршка на тврдењето на Русија дека се повлекува, Блинкен го овика Кремљ „да објави денес … дека Русија нема да ја нападне Украина. Кажете го тоа јасно. Кажете го јасно на светот“.
– Покажете го тоа со испраќање на вашите војници, вашите тенкови, вашите авиони, назад во нивните касарни и испраќање на вашите дипломати на преговарачка маса – рече тој.
Претседателот на САД, Џо Бајден од Белата куќа ја обвини Москва дека подготвува „операција со лажно знаме“ како изговор за напад и рече дека тоа може да се случи „во следните неколку дена“.
– Тие не преместија ниту еден од нивните војници. Тие распоредиле повеќе војници. Секоја индикација што ја имаме е дека тие се подготвени да одат во Украина – рече Бајден.
Тој, сепак, додаде дека дипломатијата не е мртва. – Постои патека. Има начин – рече Бајден.
Русија има голчеми воздушни, копнени и поморски сили околу Украина. Претседателот Владимир Путин и официјалните лица велат дека не планираат да ја нападнат Украина и дека војниците изведуваат само вежби.
Сепак, Путин јасно стави до знаење дека цената за отстранување на каква било закана би била тоа што Украина се согласи никогаш да не се приклучи на НАТО и западната алијанса да се повлече од делот на Источна Европа, ефикасно да го подели континентот на сфери на влијание во стилот на Студената војна.
САД соопштија дека го добиле одговорот на Путин на нивните понуди за дипломатско решение на кризата, но не дадоа никаква реакција на содржината.
Руското Министерство за надворешни работи укажа дека има малку што да се разговара.
– Во отсуство на волја од американската страна да преговара за цврсти и правно обврзувачки гаранции за нашата безбедност од САД и нивните сојузници, Русија ќе биде принудена да одговори, вклучително и со воено-технички мерки – соопшти Министерството за надворешни работи во Москва.
– Инсистираме на повлекување на сите американски вооружени сили во Централна Европа, Источна Европа и Балтикот – се додава во соопштението.
Русија го протера и американскиот дипломат број два во Москва, соопшти американскиот Стејт департмент, осудувајќи ја „неиспровоцираната“ акција.
Русија го презеде украинскиот регион Крим и почна да ги поддржува силно вооружените сепаратисти во источните региони Доњецк и Луганск во 2014 година, што предизвика војна која веќе чинеше илјадници животи.
Спорадичните борби остануваат вообичаени на истокот и украинската армија ги обвини проруските сепаратисти за 34 прекршувања на примирјето денеска, од кои во 28 користеле тешко оружје.
Потенцијално најсериозниот инцидент беше гранатирањето на градинка во селото Станица-Луганска. Внатре имало деца, но никој не бил погоден.
Украинскиот претседател Володимир Зеленски на Твитер напиша дека нападот „од страна на проруските сили е голема провокација“.
Во меѓувреме, руските новински агенции ги цитираа властите во сепаратистичката област Луганск кои велат дека го обвинуваат Киев откако ситуацијата на фронтот „значително ескалирала“.
Американскиот секретар за одбрана Лојд Остин ги опиша извештаите како „вознемирувачки“.
– Веќе некое време велевме дека Русите би можеле да направат нешто вакво за да оправдаат воен конфликт. Затоа, ќе го следиме тоа многу внимателно – им рече Остин на новинарите по состанокот со колегите од НАТО.
Путин претходно оваа недела тврдеше без докази дека Украина врши „геноцид“ во источниот регион.
Москва објави неколку најави за повлекување на војниците оваа недела и во четвртокот соопшти дека единиците на јужниот и западниот воен округ, вклучително и тенковските единици, почнале да се враќаат во своите бази од близина на Украина.
Портпаролот на Министерството за одбрана Игор Конашенков рече дека некои војници се вратиле во нивните гарнизони во неколку области далеку од границата, вклучувајќи ги Чеченија и Дагестан во Северен Кавказ и во близина на Нижни Новгород, околу 300 километри источно од Москва.
По претходно најавените повлекувања претходно оваа недела, САД, НАТО и Украина изјавија дека не виделе докази за повлекување, а Вашингтон рече дека Русија всушност преселила уште 7.000 војници во близина на границата.
Зеленски денеска нагласи дека неговата земја не бара странски сили во нејзините граници.
– Немаме потреба од војници со странски знамиња на нашата територија. Ние не го бараме тоа. Во спротивно, целиот свет би се дестабилизирал – рече украинскиот претседател.
Русија би можела да ја нападне Украина „без дополнително предупредување“, покажуваат најновите разузнавачки информации на британското Министерство за одбрана.
– Русија задржува значително воено присуство кое може да изврши инвазија без дополнително предупредување – се предупредува во објава на Твитер.
Твитот вклучува мапа на „можната оска на инвазија на претседателот Путин“, која покажа дека Русија е способна да изврши копнено движење во првата фаза кон Киев од две точки долж границата со Белорусија и една точка од границата со Западна Русија.
Мапата дополнително ја покажува можноста за копнени движења во првата фаза од две точки и од Крим кон Мариупол.
На мапата, исто така, се прикажани потенцијални поместувања на копно во втората фаза од Крим кон Миколаив и од Дњепар кон Виницја. Исто така, покажува потенцијални копнени движења од првата фаза од западната руска граница кон правец на Луганск.
Врз основа на тие разузнавачки информации, Путин „сѐ уште може да избере да спречи конфликт и да го зачува мирот“, нагласи британското Министерството.
