Регулаторна комисија за енергетика ги повика граѓаните кои користат парно да ги плаќаат редовно сметките, бидејќи како што велат од таму, според Правилата за снабдување со топлинска енергија и Тарифниот систем потрошувачот е должен редовно да ги плаќа сметките за испорачаната услуга.
Од РКЕ информираат дека постојниот вршител на енергетска дејност којшто побарал престанување или на кого му е одземена лиценцата, согласно Законот за енергетика е должен да ја обезбедува јавната услуга се до избор на нов вршител на енергетската дејност, односно во случајов производство, дистрибуција и снабдување на топлинска енергија. До изборот на нов вршител на енергетската дејност, БЕГ има должност да ја врши јавната дејност за производство, дистрибуција и снабдување на топлинска енергија.
– Потрошувачот има обврска да го плати износот на доспеаната фактура и неплатените фактури од претходните календарски месеци наведени во фактурата за последниот календарски месец како што е наведено во Правилата за снабдување со топлинска енергија – велат од РКЕ.
Дел од граѓаните престанаа да ги плаќаат сметките за парно откако РКЕ ги одзеде сите лиценци на БЕГ.
