Сѐ уште нема абер кога точно ќе започне денешната собраниска седница која првично беше закажана во 11 часот, па презакажана за 13 часот.
Како што предмалку информираа собраниските служби, причината за неколкучасовното доцнење е поради тоа што се појавиле проблеми со електрониката.
„Почитувани, седницата не е започната поради проблеми со електрониката. Екипите веќе работат на остранување на дефектот. Очекуваме во секој момент да завршат и да започне седницата. Штом ќе биде отстранет проблемот, веднаш ќе ве известиме“, информираат од Кабинетот на собранискиот спикер Талат Џафери.
Во меѓувреме, дневниот ред на седницата беше дополнет со четири точки поврзани со мерките за справување со енергетската и економската криза. Три закони доаѓаат на предлог на Владата, додека еден е на предлог на пратениците од владејачкото мнозинство.
На денешната координативна седница на првите луѓе на пратеничките групи со претседателот на Собранието Талат Џафери тие биле информирани дека овие закони се пристигнати и оти ќе бидат ставени на дневен ред на оваа седница. Законите ќе се носат по скратена постапка.
Станува збор за Предлог на закон за финансиска поддршка на социјално ранливи категории на граѓани за справување со енергетската криза, измени и дополнување на законите за енергетска ефикасност и за енергетика, трите предложени од Владата, додека пратеници од владејачко мнозинство предложија измени и дополнувања на Законот за социјална заштита, по скратена постапка.
На оваа седница е и точка на дневен ред за избор на уставни судии. На предлог на претседателката на Комисијата Марија Георгиевска, на оваа седница ќе се разгледуваат предлозите Фатмир Скендер и Татјана Васиќ Бозаџиева за уставни судии.
Во документот што е доставен до претседателот на Собранието се образложува дека Георгиевска ова го предлага поради тоа што Уставниот суд има само пет од двете судии. Доколку не се изберат наскоро уставни судии може да се доведе во прашање работата на Уставниот суд. Комисијата за прашања на избори и именувања се уште не ја завршила работата по предлозите за уставни судии. Опозициската ВМРО-ДПМНЕ со долги говори ја оддолжува работата на оваа комисија.
На дневен ред на седницата, меѓу другото, е и изборот на министер за локална сампоуправа и предлогот на ВМРО-ДПМНЕ за измени на Законот за здруженија.
