По денешниот вонреден состанок на министрите за надворешни работи на НАТО заедно со шефот на украинската дипломатија, ветено му е на Киев повеќе оружје, но не НАТО не може да објавува детали за типот на оружје, јави дописничката на МИА од Брисел.
Тоа го рече и украинскиот министер, Дмитро Кулеба, попладнево, одговарајќи на новинарско прашање дека „оружјето е како парите, тие сакаат тишина“.
Генералниот секретар на НАТО, Јенс Столтеберг, потврди дека не може да навлегува во овие детали. Неодамна некои земји членки на НАТО ја исклучија можноста од испраќање на одреден тип оружје како тенкови, нејасно е дали сите 30 стојат на овој став по денешната средба со Кулеба на која тој побара повеќе оружје и побрзо.
– Она што е важно е дека сојузниците веќе испраќаат значајна воена помош – рече Столтенберг попладнево и додаде земјите членки се согласни дека треба да се испраќа повеќе опрема и побрзо.
За Украина е важно да ја зајакне својата воена позиција на бојното поле за да биде во позиција на сила на преговарачката маса со Русија, а единствен начин да сопре војната, според Столтенберг, е Путин да ги повлече своите сили целосно од Украина.
Сепак генералниот секретар предупреди дека оваа војна може да трае уште долго и дека примарна одговорност на НАТО е да не дозволи ескалација на конфликтот надвор од Украина и на НАТО територија. Едно од прашањата што се поставуваат е дали испраќањето на офанзивно оружје може во Русија да се толкува како инволвирање на НАТО во конфликтот.
Столтенберг повтори дека НАТО не испраќа оружје директно и не планира да се инволвира.
