Поранешниот руски претседател и заменик-шеф на Советот за безбедност на Русија, Дмитриј Медведев, му ја честиташе изборната победа на новоизбраниот претседател на Република Српска и лидер на СНСД, Милорад Додик. Додик ја пофали честитката на Медведев на Твитер. Покрај честитките, Медведев го пофали и Додик.
„Ве молиме прифатете ги моите искрени честитки за победата на СНСД на општите избори во Босна и Херцеговина. Овој успех е доказ дека конзистентната политичка насока спроведена под ваше водство е силна и релевантна и одекнува кај српскиот народ во вашата земја. Целосно го поддржувам ставот на СНСД, кој е за воена неутралност на БиХ.
Високо го ценам вашиот личен придонес за продлабочување на сеопфатната соработка со Русија. Исто така, со топлина се сеќавам на нашите средби. Очекувам дека ќе го продолжиме дијалогот заснован на довербата и интересот на нашите народи, што вклучува натамошен развој на меѓупартиските контакти.
Ви посакувам, почитуван господине Додик, добро здравје и многу успех, а на сите граѓани на Република Српска им посакувам мир и благосостојба“, му напиша Медведев на новиот претседател на Република Српска, Милорад Додик.
