Портпаролот на Кремљ, Дмитриј Песков денеска изјави дека може да се согласи со САД за потребата од траен мир во Украина, но изрази песимизам за изгледите за разговори додека не се постигнат целите на „специјалната воена операција”.
И американскиот претседател Џо Бајден и неговиот руски колега Владимир Путин изјавија дека се отворени за дипломатско решение за Украина, но двајцата лидери најверојатно нема да се сретнат, а двете страни не се согласуваат околу условите на разговорите.
Американскиот државен секретар Ентони Блинкен во вчерашното интервју изјави дека конфликтот во Украина, кој сега е во својот десетти месец, речиси сигурно ќе заврши со дипломатија и преговори и дека е потребен „праведен и траен мир”.
Како одговор на неговите зборови, Песков денеска посочи дека се согласува со потребата од мир.
– Дека резултатот од она што се случува треба да биде фер и долгорочен мир – можеме да се согласиме со тоа. Но, што се однесува до изгледите за какви било преговори, во моментов не гледаме никакви – рече портпаролот на Кремљ.
Запрашан што треба да се случи за таквите изгледи да станат реални, тој рече: „Целите на специјалната воена операција мора да се постигнат. Русија мора и ќе ги постигне целите што си ги поставила”.
Засега целите на Москва во Украина не се целосно дефинирани и се чини дека се промениле со текот на времето бидејќи руските сили се соочиле со контраофанзиви на бојното поле. Русија вели дека никогаш нема да се откаже од окупираните територии во источна Украина, додека Киев ја исклучува можноста за отстапување на која било нејзина земја во замена за мир и бара Москва да ги врати сите освоени и окупирани територии, вклучително и полуостровот Крим.
