Денешното гостување на Македонија ЃП во Софија кај ЦСКА донесе тешка провокација од приврзаниците на „армејците“ кон фудбалерите од Ѓорче Петров, пишува бугарски Д Спорт.
Во ек на затегнатите односи на Македонија и Бугарија и негирањето на македонскиот народ и македонскиот јазик од страна на источниот сосед, денеска на „Бугарска Армија“, приврзаниците на ЦСКА ги дочекаа фудбалерите на Македонија ЃП со скандирања – Бугари, Бугари.
Според информациите на „Д-Спорт“, фудбалерите на Македонија ЃП ги игнорирале повиците и воопшто не изреагирале на големите провокации од страна на приврзаниците на противникот.
Исто така провокации имаше и од бугарските коментатори каде што еден од нив играчите на нашиот прволигаш ги нарекуваше „северномакедонски“, додека друг го објаснуваше името на клубот при што рече дека „Ѓорче Петров е бугарски револуционер“.
Инаку, по одиграните 0-0 во Скопје и пријатната атмосфера каде што немаше никакви провокации од нашите навивачи, екипата на Македонија ЃП загуби убедливо со 4-0 на реванш средбата во Софија. После првото полувреме водеше домаќините со 1:0, голот беше дело на Матеј после асистенцијата на Маурисио во 31 минута од средбата на стадионот „Бугарска Армија“.
Предноста ја зголеми Јомов во 61 минута, а асистентот на тој погодок Туфегџиќ стрелаше за 3:0 во 78 минута. Конечниот епилог го постави интернационалецот од Хаити, Назон, во 87 минута за убедлива победа на ЦСКА Софија од 4:0.
