Кошаркарскиот клуб Будуќност очекувано го промовираше Владимир Јовановиќ за шеф на стручниот штаб, само еден ден по состанокот на Управниот одбор, по кој беше објавено дека на чело на Будуќност останува претседателот Драган Бокан.
Јовановиќ, кој во претходниот период беше тренер на Мега, во кариерата пет години беше соработник на Душко Вујошевиќ во Партизан, пред да стане тренер на „црно-белите“. По Партизан работеше во Доњецк, Игокеи, а потоа потпиша за Локомотива Кубањ. Тој беше тренер на Шенжен во Кина, пред да стане тренер на Мега.
Беше селектор на младинската и јуниорската репрезентација на Србија со која беше шампион на Европа во 2009 и 2017 година. Владимир Јовановиќ повторно се враќа во Црна Гора, бидејќи во 2014 година му беше помошник на Лука Павиќевиќ во репрезентацијата.
Сега на првиот човек на клубот и тренерот Јовановиќ им претстои многу работа за да формираат тим кој ќе биде конкурентен во АБА лигата и Еврокупот, кој ќе успее да ги одбрани двата трофеи во Црна Гора.
Под договор моментално се Игор Дробњак и Един Атиќ.
