Нема време до крајот на француското претседателство да се отвори Уставот на Македонија за во него да се впишат Бугарите како државотворен народ, што е едно од клучните барања на Софија, изјави бугарската министерка за надворешни работи Теодора Генчовска, пренесува БНТ.
– Реално, до крајот на француското претседателство со Советот на Европа, се сомневам дека моите колеги од Северна Македонија ќе можат да го отворат Уставот и да го завршат овој процес – рече шефицата на бугарската дипломатија.
Инаку, Генчовска додаде и дека има сериозни несогласувања помеѓу бугарското МНР и тимот на советници за надворешна политика на бугарскиот премиер Кирил Петков во однос на прашањето за евроинтеграциите и преговорите со Македонија.
Таа исто така додаде и дека сè уште нема документ меѓу земјава и Бугарија што би бил основа за договор.
– Речиси ниту една од другите четири точки од Планот 4 + 1 не е исполнето од страна на Скопје – рекла Генчовска.
Министерката исто така посочи дека до бугарското Министерство за надворешни работи не е пристигнат никаков официјален документ, како што изјави министерот за надворешни работи на Македонија, Бујар Османи.
– Билатералните разговори се одржаа на 10 февруари и се работеше на предлог-протокол, но за жал резултатите беа незадоволителни – изјави Генчовска.
