Во раните утрински часови на 24 февруари, кога руските сили почнаа да ја напаѓаат Украина, Артур, како и милиони негови сограѓани, го грабна неговиот мобилен телефон за да стапи во контакт со семејството, пишува Гардијан.
Но, додека повеќето ги повикуваа своите најблиски да видат дали се добро, Артур (27) му пишуваше на својот татко Олег, полковник на проруските сепаратистички сили во источна Украина, од друга причина.
„Вие идиоти“, му напиша.
„Не земај го пиштолот. Киев веднаш ќе падне“, му одговори Олег.
Артур не го послушал советот на својот татко и прво се пријавил како волонтер, а подоцна и се приклучил на украинската војска. Неодамна, тој учествуваше во контраофанзивата на северот и истокот на Украина.
За сето тоа време тој преку СМС пораки одржувал контакт со својот татко во Доњецк, окупиран од Русија. Артур е роден во воено семејство во Бориспил, град во близина на Киев. Неговиот татко е по потекло од источниот украински регион Доњецк и служел во украинската армија до 2011 година.
Откако се разведе од мајката на Артур во 2011 година, Олег се преселил во Русија во потрага по работа. Во 2016 година, тој им се приклучи на проруските сепаратистички сили во Доњецк.
„Бев шокиран кога ми кажа дека им се придружува на сепаратистите“, вели Артур.
Иако неговиот татко со текот на времето имал сè повеќе проруски ставови, тие останале во контакт. Но, тие почнале да се оддалечуваат кога започна инвазијата на Украина во февруари 2022 година. На почетокот на март, Артур му испратил кратка видео порака на својот татко, исмејувајќи го за неговата изјава дека Киев ќе падне.
– Се шетам наоколу, но не гледам ниту еден Русин. Изгледа исчезнаа. Може ли да ми дадеш некој совет, не разбирам каде се? – му рече тој на својот татко.
Олег одговорил дека работите наскоро ќе се сменат и повторно му рекол да се ослободи од оружјето.
„Во тој момент веќе видов дека се помалку верува во руската победа“, изјави Артур.
Убиства на цивили во Буча
Тие повторно зборувале откако се појавија докази за руските убиства на цивили во Буча. Олег рекол дека тие извештаи се лажни и дека цивилите биле убиени од самите Украинци.
– Му кажав дека сум во Буча и бев сведок на тоа што се случи, но тој сепак не веруваше. Се откажав од обидот да го убедам во што било, тоа е само губење време и енергија – изјави Артур.
Кога новинарот на „Гардијан“ го прашал Артур што би направил доколку го види својот татко на бојното поле, Артур одговорил: „Мислам дека не би можел да пукам во него или он во мене. Кој би можел да го убие својот татко?“
Олег во неодамнешната порака до Артур напиша дека сѐ уште е негов син и дека сака тој да биде среќен. Но, Артур го нема истиот став.
„Мислам дека за ова треба да одговара на суд. Би сакал тој да ја види нашата победа и неговиот свет да се сруши. Татко ми ги предаде семејството и државата“, рече Артур и додаде дека единицата знае каде е неговиот татко, но никогаш не ја доведе во прашање неговата лојалност.
„Тие знаат дека јас сум 100% посветен на Украина“, рече тој.
