Русија почна да преместува мал број војници од позициите околу украинскиот главен град Киев, соопшти синоќа Пентагон, притоа оценувајќи дека тоа е повеќе прераспоредување отколку повлекување од позициите.
Портпаролката на Белата куќа, Кејт Бедингфилд, изјави дека Русија ги прераспоредува своите војници во Украина, а не ги повлекува.
– Имаше ли движења на некои руски единици од Киев во изминатиот ден или нешто слично? Да, така мислиме. Мал број – истакна портпаролот на Пентагон, Џон Кирби, на брифингот со новинарите.
– Ние веруваме дека ова е репозиционирање, а не вистинско повлекување и дека сите треба да бидеме подготвени за голема офанзива во другите области на Украина. Тоа не значи дека заканата кон Киев е завршена – нагласи Кирби.
Во меѓувреме е издадено предупредување од Стејт департментот, дека Москва може да приведува американски граѓани во Русија, советувајќи ги Американците да не патуваат во таа земја.
Во препораката за патување се наведува и дека предупредувањето е поради „неиспровоцираната и неоправдана инвазија врз Украина од страна на руските воени сили“, како и поради можноста руските власти да ги вознемируваат американските граѓани.
Американците кои се наоѓаат моментално во Русија, повторно беа повикани да ја напуштат земјата „веднаш“.
