Александар Василевски-Нинџа, кој беше главен сведок за предметот „Организатори на 27 април“, доби нова затворска казна, објави порталот А1.Он.
Тој вчера е осуден на шест месеци затвор за помагање при бегството на Горан Грујевски, поранешен началник на Петтата управа во Управата за безбедност и контраразунавање (УБК) и неговиот соработник Никола Бошковски.
Осудителната пресуда е донесена по признание на вина од страна на Нинџа.
Инаку, Грујовски и Бошковски побегнаа во јули 2017 година, а беа уапсени на аеродромот во Солун кога со лажни бугарски пасоши се обиделе да се качат на авион за Будимпешта.
Тие веднаш беа во екстрадиционен притвор, ама никогаш не беа екстрадирани во Македонија поради помилувањето дадено од поранешниот претседател Ѓорге Иванов.
Нинџа, пак, ѝ стана познат на јавноста откако беше обвинет за упадот во Собранието на 27 април и тогаш тој доби 7 години затвор.
