Според јавно достапните мапи објавени од руски и украински воени блогери, руските сили сега се на околу три километри јужно од стратешки важниот источен украински град Похровск. Американската новинска агенција Ројтерс ги истражуваше клучните информации за важноста на овој град и моменталната состојба на теренот.
Покровск, кој се наоѓа во регионот Доњецк во источна Украина, е важен патен и железнички центар. Пред војната, градот имал околу 60.000 жители, додека украинските проценки наведуваат дека во моментов останале околу 11.000 луѓе.
Градот се наоѓа на клучната рута што ја користи украинската војска за снабдување со други загрозени источни упоришта, вклучувајќи ги градовите Часив Јар и Костијантинивка.
Во близина на Похровск се наоѓа единствениот украински рудник кој произведува коксен јаглен, неопходен за челичната индустрија, која беше клучна за украинската економија пред војната. Украинскиот производител на челик Метинвест БВ неодамна делумно ги прекина операциите на рудникот поради близината на руските сили. Целосното исклучување може да го намали производството на челик на половина, предупредува синдикатот на украинските челичари.
Од 2014 година, Похровск е домаќин на технички универзитет, најголем и најстар во регионот, но универзитетот привремено ја прекина својата работа поради воени операции.
Зошто Русија го сака Похровск?
Русија тврди дека го анектирала источниот регион Доњецк и смета дека заземањето на Похровск е клучен чекор кон целосно инкорпорирање на овој регион на нејзина територија. Киев и Западот ги отфрлаат територијалните претензии на Русија како нелегални и ја обвинуваат Москва за колонијална војна.
Заземањето на Похровск, кој руските медиуми го нарекуваат „порта за Доњецк“, ќе и овозможи на Москва значително да ги наруши украинските линии за снабдување на источниот фронт. Исто така, контролата на овој град би ја засилила руската офанзива на Часив Јар, кој се наоѓа на повисоко место со потенцијална доминација на поширок простор.
Ограничувањето на украинскиот пристап до патната мрежа во близина на Похровск ќе ја отежне одбраната на околните територии и ќе и овозможи на Русија да се консолидира и да го унапреди фронтот.
Како Украина го брани Похровск?
Украинската армија неодамна го разреши командантот одговорен за одбраната на регионот Доњецк. Генералот Олександр Луценко, кој беше обвинет за неуспехот да го запре руското напредување кон Покровск, беше заменет со генералот Олександр Тарнавски.
Украинскиот врховен командант Олександр Сирски рече дека војниците во и околу Похровск ги зајакнале своите одбранбени позиции, додека нови резервисти, муниција и опрема се испратени за зајакнување на одбраната.
Руските сили во последните месеци окупираа села и други населби јужно од Похровск, додека Украина тврди дека Москва вложува огромни напори, но со големи загуби. Од друга страна, Русија вели дека и украинските сили трпат значителни загуби, додека двете страни не објавуваат точни бројки на жртви.
Украинскиот претседател Володимир Зеленски го посети Похровск во ноември, разговараше со војниците кои го бранат градот и им додели воени одликувања.
Ситуацијата во Похровск
Украинското знаме се уште се вее над градот, но Похровск е во лоша состојба. Нема струја, гас, парно или вода.
Според снимката на Ројтерс објавена на 13 декември, фасадите на станбените згради се тешко оштетени, а улиците се претежно окупирани од постари жители. На коловозите се поставени противтенковски пречки, додека со помош на генератор работи мал дуќан. Во далечината сè уште се слуша гранатирање, што сведочи за интензивните борби за овој стратешки град, наведува Ројтерс.
