Украинскиот претседател Володимир Зеленски пристигна во Канада во четвртокот навечер за да побара помош за Киев во борбата против руската инвазија. Се работи за ненајавена посета.
Украинскиот претседател Володимир Зеленски денеска ќе разговара со канадскиот премиер Џастин Трудо и ќе се обрати пред канадскиот парламент. Двајцата лидери ќе отпатуваат и во Торонто, каде ќе се сретнат со бизнисмени и членови на заедницата на Канаѓаните со украинско потекло.
Во Канада има голема украинска заедница, а владата на Трудо вети цврста и постојана поддршка на Украина во нејзината борба против руските сили.
Во првата посета на Канада, украинскиот претседател отпатува од Соединетите Американски Држави, каде присуствуваше на седницата на Генералното собрание на Обединетите нации и во четвртокот се сретна со американскиот претседател Џо Бајден и лидерите на Конгресот.
