„Овде сум во име на храбрите. Во име на нашите воени херои кои се во рововите и ја штитат Украина од непријателски ракети“, им рече украинскиот претседател Володимир Зеленски пред британските парламентарци во Лондон.
Како што јави Радио Слободна Европа, Зеленски му се заблагодари на Обединетото Кралство за обезбедувањето опрема на неговите војници и за обуката на оние на линијата на фронтот во салата на Вестминстерската палата, за време на неговата прва посета на британскиот главен град по руската инвазија на Украина минатата година. .
Тој му се заблагодари на поранешниот премиер Борис Џонсон, затоа што „ги обедини другите кога се чинеше апсолутно, апсолутно невозможно“. „Ви благодарам“, му рече Зеленски на Џонсон.
Зеленски рече дека Украинците и Британците ја бранеа слободата за време на Втората светска војна и посочи дека Русија ќе загуби. Тој и се заблагодари на Британија за воведувањето санкции кон Русија и оцени дека тие мора да продолжат додека Кремљ повеќе не може да ја финансира војната против Украина.
Претходно, британскиот премиер Риши Сунак во обраќањето пред британскиот парламент рече дека Обединетото Кралство ќе ја поддржи Украина до крај. Сунак рече дека Британија е водечки европски сојузник на Украина во НАТО. Тој нагласи дека земјата ќе остане обединета со Украина додека не се обезбеди пораз на „неиспровоцираната агресија“ на Путин.
Велика Британија го прошири списокот на санкции против Русија, вклучувајќи компании кои произведуваат воена опрема и неколку поединци „поврзани“ со рускиот претседател Владимир Путин, соопшти британската влада.
