Претседателот на Украина, Володимир Зеленски, во пресрет на Самитот на Европската политичка заедница во Гранада изјави дека единството на Европа мора да се зачува.
„Главниот предизвик е да се зачува единството во Европа. Не зборувам само за земјите во ЕУ, туку за цела Европа“, рече Зеленски, кој како и на претходниот Самит во Кишињев пристигна прв.
Тој рече дека на Украина ќе и треба одбранбен штит во зима, бидејќи ќе има различни напади од Русија.
Зборувајќи за разговорот со американскиот претседател Џозеф Бајден, Зеленски истакна дека Украина ја има неговата 100% поддршка, но дека во Америка претстојат многу важни избори и се слушаат различни гласови, од кои некои се „многу чудни“.
