Јахтата „Ирина ВУ“, во сопственост на компанијата на рускиот олигарх Алишер Усманов, близок на рускиот претседател Владимир Путин, која се наоѓаше на листата на санкции на ЕУ, САД и Велика Британија поради војната во Украина е украдена од марината Бетина на хрватскиот остров Муртер.
Сè уште не е јасно како јахтата долга речиси 35 метри и 240 тони, исчезнала од пристаништeто на кое била запечатена. Уште помалку е јасно како никој од надлежните не го забележал тоа три месеци.
Јахта моментално се наоѓа во турската марина Дидим на Егејското Море, а хрватското Министерство за море, трговија и инфраструктура дури минатата недела дозна за оваа бизарна кражба и очигледен пропуст на безбедноста.
Според податоците што може да се најдат на специјализираната веб-страница marinetraffic.com, јахтата „Ирина ВУ“ испловила од пристаништето Бетина на 6 октомври 2022 година, нешто по 10 часот, а три дена подоцна е закотвена во турското пристаниште Дидим.
Храватските медиуми пишуваат дека збрката околу исчезнувањето на јахтата, се случила бидејќи хрватската полиција немала официјални податоци или информации дека јахтата „Ирина ВУ“ е под санкции, па граничната полиција немала причина да интервенира и да го спречи овој луксузен брод да ги напушти хрватските територијални води.
Во Хрватска сега се води истрага во која се вклучени хрватското државно обвинителство, Хрватската безбедносно-разузнавачка агенција и меѓународни служби, а распишана е и меѓународна потерница.
Albanian
English
Macedonian
Turkish
